Eth Conselh dera UE manòbre entà ressuscitar eth Chat Control 1.0 qu'eth Parlament ja auie refusat
Era presidéncia deth Parlament e era presidéncia xipriòta deth Conselh cerquen tornar a validar er escaneig de messatges privadi maugrat qu'es eurodiputats ja auien votat en contra. Ei un moviment gravíssim e entièraments antidemocratic.
Eth Chat Control 1.0 ei eth regim temporau que permet as plataformes (Gmail, Messenger...) d'escanejar messatges privadi, coma excepcion ara privadança dera UE e a fòrça constitucions, que ac proïbissen. Caducèc eth 3 d'abriu de 2026, quan eth Parlament ne refusèc era proròga.
Era lei permanenta, eth Chat Control 2.0, se negòcie ara e va ath delà: obligacions de deteccion, "mitigacion de risqui" e verificacion d'edat. Servirà entà legalizar e normalizar er escaneig massiu e entà menaçar eth chifratge extrèm a extrèm. Mès, a mès, se ressuscite eth 1.0.
Maugrat qu'eth Parlament aucic eth 1.0, era sua presidenta, Roberta Metsola, e era presidéncia xipriòta deth Conselh sagen ressuscitar-lo pera via deth Conselh, maugrat qu'es eurodiputats ja auien votat en contra. Ac revele POLITICO. Metsola demanèc as caps des païsi dera UE qu'eth Conselh aprovèsse eth tèxte, maugrat eth non deth Parlament.
Eth mecanisme ei subtil. S'eth Conselh adòpte era sua posicion en prumèra lectura, er ahèr passe a dusau lectura ath Parlament, e alavetz es nòrmes càmbien en favor de qui vò era extension. En prumèra lectura n'i auie pro damb majoria simpla entà díder non, 311 vòts contra 228. En dusau, entà refusar eth tèxte deth Conselh eth Parlament a besonh de majoria absoluta: 361 vòts de 720, i age er absentisme que i age. E se non les amasse, eth tèxte passe solet. Eth silenci ei òc, per er article 294 deth Tractat de Foncionament dera Union.
Eth tripijòc que hèn invertís coma aurie de foncionar era democracia. S'use era cramba mès aluenhada des eleccions democratiques, es govèrns amassadi ath Conselh, entà pressionar era cramba que òc que votam dirèctament. Era volontat ciutadana exprimida as urnes europèes demore subordinada a ua manòbra de procediment. Legau? Dilhèu. Democratic? Non. E, coïncidentament, es negociacions deth Chat Control 2.0 acaben just en aguesti madeishi dies.